傳統上9月1日係各中小學開學嘅日子，唔知大家記唔記得當年第一日返學做咗啲咩？

對古人嚟講，「開學」即拜師入學，係一件非常嚴肅同隆重嘅事，並會舉行一連串儀式，入學禮同成人禮、婚禮、葬禮齊名，合稱人生四大禮。

入學禮包括正衣冠、行拜師禮、淨手淨心、硃砂開智、擊鼓鳴志、啟蒙描紅等環節。老師會先依次為學生整理衣冠，然後帶領學生向「至聖先師」孔子行九叩禮及對老師三叩首，隨後學生將雙手放入水盆，寓意淨手淨心，專心學習。老師亦會用蘸有硃砂色嘅毛筆喺學生嘅眉心點上紅「痣」，以開通「智」慧。點痣之後要擊鼓，以鼓聲激發起學生宏大嘅志向。最後，喺老師嘅指導下，學生開筆寫下人生第一個字。禮成！